Weromrop.frl - útstjoerings

Foar Fryslân Wetterlân ha twa jonge filmmakkers yn gearwurking mei IdtV en Omrop Fryslân Fryske filmkes makke mei wetter as tema. De film 'Yn syn hannen' fan Murk Jaep van der Schaaf giet oer ielfisker Ale de Jager, dy't mei syn 42 jier jong is foar ien mei sa'n berop. We sjogge de film en as yntroduksje fertelt Murk Jaep oer wat er mei wetter hat, hy brocht as Akkrumer in soad op it wetter troch, en we sjogge by de opnames. Foar de film 'Stjoerlju' makke Remco Wagenaar in portret fan boatsjeminsken yn de Johan Frisoslûs yn Starum.

Yn 1982 begûn kroechbaas Joop Mulder in festival op Skylge. Doe kamen der 2.000 besikers, no 25 jier letter lûkt Oerol 50.000 besikers. Yn de dokumintêre fertelt Mulder oer it begjin en syn dreamen. Bestie it festival earst benammen út strjitteäter, letter kamen der foarstellingen op lokaasjes as strân en bosk by en ek yntym teäter yn skuorkes. Neist teäter is der ek muzyk en de lêste jierren ek byldzjende keunst. It kantoar wie earder by Mulder thús, no wurkje 600 minsken oan Oerol.

We folgje Doutzen Kroes (21) fan Eastermar by har wurk yn Milaan. Nei de havo soe se nei de pabo, mar dat rûn oars. Nei't se wat fakânsjefoto's opstjoerde nei in modelleburo yn de hoop op in bybaantsje, is se no in ferneamd model en sakefrou. "Ik bin myn eigen bedriuw." We sjogge achter de skermen by moadeshows, castings en fittings. Se fertelt oer har libben as topmodel, oer de moaie glamourkant, mar ek oer de mindere kanten sa as de iensumheid, de lange dagen en it reizgjen. Ek binne we by har thús yn Eastermar, se wol goeie dingen mei har jild dwaan.

Portret fan Simon Vlietstra, alias Shakey Sam, de iennige Fryske bluesartyst. 25 Jier nei syn selskeazen dea wurdt er eare mei in tribute. Freonen, famylje (broer, mem, soan), kollega's en bandleden sjogge werom en fertelle oer har bân mei de sjonger en mûlharpspiler. Syn artystenamme ûntstie om't er altyd senuwachtich wie. Hy bruts lanlik troch en siet by de band Barrelhouse. Nei in drege jeugd (út hûs pleatst) kaam er yn de kunde mei de blues fan Cuby and The Blizzards. It wie net in maklik man, mar wol earlik mei 'zeggingskracht' yn syn muzyk.

Nynke Laverman is dwaande mei har nije programma 'De maisfrou'. Se fertelt oer har ideeën en ynspiraasjeboarnen. De teksten binne skreaun troch dichter Albertina Soepboer, dy't har ynspirearje liet troch Meksiko, it lân dêr't se beide ek hinne west ha. Se fertelle oer de teksten en de muzyk en we sjogge by de opnamen en de muzikale ynfolling fan slachwurker Sytze Pruiksma.