Weromrop.frl - útstjoerings

We folgje Doutzen Kroes (21) fan Eastermar by har wurk yn Milaan. Nei de havo soe se nei de pabo, mar dat rûn oars. Nei't se wat fakânsjefoto's opstjoerde nei in modelleburo yn de hoop op in bybaantsje, is se no in ferneamd model en sakefrou. "Ik bin myn eigen bedriuw." We sjogge achter de skermen by moadeshows, castings en fittings. Se fertelt oer har libben as topmodel, oer de moaie glamourkant, mar ek oer de mindere kanten sa as de iensumheid, de lange dagen en it reizgjen. Ek binne we by har thús yn Eastermar, se wol goeie dingen mei har jild dwaan.

Portret fan Simon Vlietstra, alias Shakey Sam, de iennige Fryske bluesartyst. 25 Jier nei syn selskeazen dea wurdt er eare mei in tribute. Freonen, famylje (broer, mem, soan), kollega's en bandleden sjogge werom en fertelle oer har bân mei de sjonger en mûlharpspiler. Syn artystenamme ûntstie om't er altyd senuwachtich wie. Hy bruts lanlik troch en siet by de band Barrelhouse. Nei in drege jeugd (út hûs pleatst) kaam er yn de kunde mei de blues fan Cuby and The Blizzards. It wie net in maklik man, mar wol earlik mei 'zeggingskracht' yn syn muzyk.

Nynke Laverman is dwaande mei har nije programma 'De maisfrou'. Se fertelt oer har ideeën en ynspiraasjeboarnen. De teksten binne skreaun troch dichter Albertina Soepboer, dy't har ynspirearje liet troch Meksiko, it lân dêr't se beide ek hinne west ha. Se fertelle oer de teksten en de muzyk en we sjogge by de opnamen en de muzikale ynfolling fan slachwurker Sytze Pruiksma.

Mindert Wijnstra is ûnderwizer, berneboekeskriuwer en ferhaleferteller. Syn dochter Babs is yllustratrise en makket ek wurk foar de boeken fan har heit. Se die de keunstakademy en makket ek ferhalen en tekeningen foar it skoaltelefyzjeprogramma It Boskwyfke. Se komme fan Warns, flakby de Iselmarkust dy't beide ynspiraasje jout. We sjogge Mindert as ferhaleferteller yn aksje en Babs achter de tekentafel. Om't Mindert oan in ienmansskoalle stiet, hat er syn dochter seis jier lang yn de klasse hân. Se fertelle oer har gearwurking en de humor yn it wurk.

Hans de Haas kaam as jonge yn 1944 mei syn heit Roelof Horreüs de Haas (biologylearaar) as ûnderdûker nei de pleats Heach Hiem yn de Alde Feanen, by de famylje De Boer. Heit lei fan alles fêst (yn tekst en byld) oer dy perioade, fan oerstreamingen oant reedriden. Soan Hans fertelt deroer en lit fan alles sjen. Der is in tentoanstelling yn it Fersetsmuseum en ek giet er werom nei de pleats.