Weromrop.frl - útstjoerings

Yn Hjoed fan 13 april 2001 belibbet Fryslân dei trije fan de tongblierkrisis. De RVV (Rijksdienst voor de keuring van Vee en Vlees) moat de bisten romje en plysje kontrolearret elk dy't it besmette gebiet yn of út moat. Ferslachjouwer Douwe Boersma docht ferslach út Ie wei, hy praat mei de winkeleigener dy't syn klanten gerêststelt dat se net hoege te hamsterjen. Sels hellet er syn bôlen by de ôfsetting wei.

Yn dizze ekstra Hjoed it nijs dat op 11 april 2001 Fryslân te meitsjen krijt mei de útbraak fan tongblier. Op in pleats yn Ie komt de melding dat twa kij besmet rekke binne mei it firus. Feearts Egberink komt by de melkfeehâlder om syn kij te ûndersykjen. Al it fee, sa'n 100 kij, moat romme wurde. De plysje set it gebiet ôf. Yn in straal fan twa kilometer om de pleats hinne moatte alle bisten ek romme wurde. It giet om 37 bedriuwen mei tusken de 2.500 en 4.000 stiks fee.

Yn Hjoed fan 4 juny 1998 is it nijs dat in bommelding it histoarysk kongres fan Fryslân 500 fersteurde. De melding kaam by de koster fan de Grutte Tsjerke yn Ljouwert. Alle 250 dielnimmers moasten derút. Tal fan Fryske organisaasjes, lykas de FNP, binne it net iens mei Fryslân 500, mar feroardielje dizze aksje fan it Frysk Nasjonaal Befrijingsfront wol. Tsjinstanners fan it feest wolle in stille tocht organisearje.

Foar de start fan regionale telefyzje makke NOVA, it aktualiteiteprogramma fan de NOS, dêr in reportaazje oer. De ferslachjouwer, dy't him ôffreget oft der wol genôch nijs wêze sil yn Fryslân om alle dagen in programma te meitsjen, sjocht achter de skermen by de redaksjegearkomsten, en giet mei Gerard van der Veer op paad dy't in item makket oer Houtigehage dat gjin sporthal krijt. Fierder binne bylden te sjen fan de redaksje, de montaazje, it oefenjen fan de útstjoering en de rezjyromte. Friezen om utens Heinze Bakker en Pia Dijkstra fertelle beide hoe't se der tsjin oan sjogge.

Yn Hjoed in reportaazje oer de tariedings foar de iepen dagen fan de fleanbasis yn Ljouwert yn july 1998. Twa wiken yn it foar wurdt noch drok oefene en lizze de draaiboeken klear foar it ferfier fan al dy tûzenen besikers.