Weromrop.frl - útstjoerings

De skriuwer Gerard Reve wenne fan 1964 oant 1971 yn Greonterp. Hy skreau dêr it brieveboek Nader tot U, dat yn it Dútsk oerset waard en Reve bekearde him ta it roomsk-katolisisme. Roomsk geastlike Antoine Bodar is fan fan it wurk fan Reve. Hendrik Algra moast neat fan Reve hawwe om syn blasfemy en skriuwen oer homoseksualiteit. Dochter Hetty Runia-Algra fertelt deroer. Kunde sjogge werom op de tiid dat Reve yn Fryslân wenne en ek syn partners Willem van Albada (Teigetje) en Henk van Manen (Woelrat) komme oan it wurd.

Portret fan Roger Raveel, Belgyske keunstner, en syn eksposysje yn Museum Belvédère yn Oranjewâld. Thom Mercuur siket Raveel op yn Oostende (België) om wurken foar de tentoanstelling út te sykjen. Raveel (1921) fertelt oer syn libben en wurk. In freon en biograaf sketse syn wurk en betsjutting.

Portret fan operaregisseur Corina van Eijk en de opera (yn de greide) fan Spangea. We folgje Van Eijk by de repetysjes foar de operafilm Samson en Delila en se fertelt oer har leafde foar opera dy't se fan hûs út meikrigen hat. Sjongers fertelle oer de bysûndere manier fan wurkjen yn de tinte. Ek binne fragminten te sjen fan eardere útfieringen.

Yn 1932 wie de Ofslútdyk, de dyk tusken Fryslân en Noard-Hollân klear. We sjogge mei oerpakesizzer Jan Lely nei de betinker fan de dyk, wetterboukundige Lely dêr't in stânbyld fan op de dyk stiet. We prate mei in brûker fan de dyk dy't der alle dagen oerhinne rydt, mei toeristen dy't út de hiele wrâld komme om de dyk te sjen, ien dy't alles sammelet oer de dyk en mei in fisker fan Makkum dêr't it wurk foar feroare nei de ôfsluting fan de Sudersee. It duo Nanne Kalma en Ankie van der Meer hat lieten makke oer de dyk dêr't se wat fan hearre litte.

Portret fan kommunist Rinze Visser fan De Lemmer, lid fan de NCPN. Hy is al 37 jier riedslid en dwaande mei syn 10e perioade yn de ried fan Lemsterlân. Hy fertelt oer syn idealen, en wol it better meitsje foar de gewoane minske. We sjogge dat er oaren helpt by administrative putsjes en we sjogge him thús oan it skriuwen foar de twawyklikae krante Manifest. Kollega-riedsleden fertelle oer it 'Rinze-effekt' en dat er in 'wandelende ombudsman' is. Hy praat in soad mei minsken op de dyk en is ek geregeld te finen by de leagenbank. Ek tal fan Lemsters fertelle wêrom't se op Visser stimme.