Sykje

Hiel Fryslân wie ûntregele doe't der op woansdei 2 maart 2005 in tsjok pak snie foel. Omrop Fryslân kaam om 13.00 oere mei in ekstra Hjoed.

Yn de dokumintêre “De winter fan 1929” fertelle trettjin Fryzen hoe’t sy de winter belibbe ha. Dizze ekstreme winter levere bysûndere ferhalen op. Bauke Tuinstra koe bygelyks net sliepe fan de kjeld en socht de waarmte op yn it strie en Sikke Kooistra ride de Alvestedetocht mei 300 minsken dêr't de helte fan net oer de finish kaam.

“It wiene fantastyske dagen troch de waarmte, solidariteit en de manier wêrop we funksjonearre koene. It wiene hiele moaie dagen,” sei Gryt van Duinen yn de dokumintêre oer de sniestoarm fan 1979. Net elkenien hie dizze gefoelens by de stoarm. Yn in koarte tiid wie it iepenbiere libben yn Fryslân folslein fersteurd en tal fan doarpen en stêden wiene dagenlang fan de bûtenwrâld ôfsletten. Dit soarge foar in spannende wike yn Fryslân mei tûzenen ferhalen dy’t fia Radio Fryslân de hiele wike útstjoerd waarden.