Weromrop.frl - útstjoerings

Yn dit programma sjogge we by Fryske famyljes dy't nei Fryslân op besite komme. In soan en dochter fan de famylje Van der Sluis gienen yn 1952 nei Nij-Seelân, twa jier letter folge de rest fan de famylje. No binne se nei 40 jier foar it earst wer werom yn Fryslân en sjogge ûnder oare yn it âlderlik hûs yn Boalsert. Ek sjogge we by oare famyljes dy't sa no en dan wer nei it heitelân komme. Mei argyfbylden fan it Polygoonsjoernaal oer in grut emigraasjeskip dat út de Rotterdamske haven fart.

Op 30 jannewaris 1999 waard de fuotbalwedstryd Hurdegaryp - Warkum spile; in topper yn de twadde klasse. Hurdegaryp wie de grutste koprinner, mar Warkum makke de kâns om de topposysje oer te nimmen net wier: it waard 6-1.

Programma oer de fjoertoer fan Skylge, de Brandaris. Yn boarnen stiet beskreaun dat al yn 1323 it beslút naam is ta de bou fan it beaken foar de skipfeart. De fjoertoerwachter fan earder hyt no ferkearstsjinstmeiwurker. Meiwurkers fan no fertelle oer har wurk en ek âld-fjoertoerwachter Tjaard Klijn komt oan it wurd, mei argyfbylden. Yn museum it Behouden Huys wurdt wurke oan in tentoanstelling mei in panorama. Ek de KNRM en skippers fertelle oer it belang fan in bemanne Brandaris.

Fjouwer manlju, leden fan de Knokploech fan Seisbierrum, binne yn 1944 deasketten troch de Dútsers foar har belutsenheid by it ferset, ûnder oare de oerfal op it gemeentehûs fan Sint-Anne dêr't se it befolkingsregister weinaam ha. Neibesteanden fertelle oer de geheime skûlplakken yn û.o. de pleats by Liauckamastate en hoe't de Dútsers de mannen oppakke koenen nei't se tipt wienen troch ferrieder Frans Michon. De fjouwer mannen wienen Lolle Rondaan, Folkert Bergsma, Gerrit Schuil en Gerben Derisé Oswald.

Yn dit programma sjogge we trije portretten fan trije froulju yn de tsjerklike wrâld. Alie de Lange is pastor yn de katolike Bonifatiustsjerke yn Ljouwert, Rieny de Ruiter is Heilsoldate (Leger des Heils) yn Harns en Corry Nicolay is dûmny yn de herfoarme gemeente Arum/Kimswert. We sjogge de froulju oan it foargean yn de gemeente yn de mis/tsjinst en se fertelle oer har ropping en missy.