Weromrop.frl - útstjoerings

Wolkom op weromrop.frl, de argyfwebside fan Omrop Fryslân. Besjoch hjir in seleksje út de earste tweintich jier Fryske telefyzje, fan 1985 oant en mei 2005.

LTV_FLINKE_JONGES_211297_WR

Flinke jonges

21 Desimber 1997

De kriminaliteit ûnder jongeren nimt mear en mear ta, der is geweld op strjitte, fernielingen en fandalisme en it begjint ek mear op jongere leeftiid. Yn dit programma folgje we in pear fan de jongeren dy't by Het Buro begelaat wurde om werom te kinnen nei de maatskippij, skoalle of wurk. De begelieders komme oan it wurd en we sjogge by de wurkplakken, lykas de fleanbasis en it Cambuurstadion. Yn de Ljouwerter wyk Wielenpôlle binne jongerewurkers ek aktyf.
LTV_FRYSLANBOPPE1992_WR

Fryslân Boppe: Slach by Warns en Frico Domo

25 Oktober 1992

Gryt van Duinen liedt twa diskusjes: Klaas Jansma en Durk van der Schaaf prate oer de betinking fan de Slach by Warns. De twadde diskusje giet oer de reorganisaasje by Frico Domo, mei boeren, wurknimmers en minsken fan it fakbûn.

Under de namme Fryslân Boppe stjoerde Omrop Fryslân tusken 1991 en 1994 op de sneinen in rige diskusjes oer maatskiplike ûnderwerpen út, fanút de Koperen Tuin yn Ljouwert of in oare bysûndere lokaasje.
LTV_FERHUZING_FRIES_MUSEUM_250104_WR

Heakken en oezen: by de ferhuzing fan it Fries Museum

25 Jannewaris 2004

Arsjitekt Abe Bonnema liet 18 miljoen euro nei foar it Fries Museum mei as betingst dat der nijbou komme soe op it Ljouwerter Saailân/Wilhelminaplein. Net elk hat der betrouwen yn dat de kolleksjes goed foar it fuotljocht komme, lykas it Keninklik Frysk Genoatskip dat mei in grutte kolleksje de basis fan it museum is en ek de Ottema-Kingma Stichting hat fragen. Meiwurkers fan it Fries Museum komme oan it wurd en litte in soad fan de kolleksje sjen, skilderijen tekstyl, ierdewurk en sulver. En dan is der noch de fraach wat mei de pannen oan de Turfmerk barre moat.