Weromrop.frl - útstjoerings

Tony Feitsma (1928-2009), âld-professor Fryske taal en letterkunde wie striidber as it om Fryske oangelegenheden gie. Oer de rol fan de Fryske beweging giet se yn dit programma yn diskusje mei skriuwer Piter Boersma. Dit portret út 1999 is gearstald troch Gryt van Duinen.

Yn dit programma komme trije soarten fan bûtenlânsk leauwen oan de oarder. We sjogge by in Turkske man en frou op It Hearrenfean dy't islamitysk binne. De man bidt freedtemiddei yn de moskee, de frou docht dat nei wurktiid thús. Op it wurk hat se gjin holdoek om, thús wol. Twa Amerikaanske jonges geane de doarren del as sindeling om te fertellen oer har tsjerke, Jezus Christus van de heiligen van de laatste dagen. It komt oarspronklik út Salt Lake City dêr't ek in hiel grut famylje-argyf is. We sjogge ek by in tsjinst yn Ljouwert.

Yn dit programma folgje we de Ryksplysje op it wetter. Troch in kommende reorganisaasje ha de plysjeminsken noed oer de takomst. Har wurk sil foar in grut part oernommen wurde troch regioplysje. De Ryksplysje fart op de Fryske wetters, soms previntyf en faak kontrolearjend. Se komme by alle soarten skippen oanboard, fan beropsfeart oant charter en fan rekreaasje oant speedboat. Sa nimme se meunsters fan wetter dêr't oalje yn oantroffen is, freegje se nei de goede papieren en kontrolearje se op feilichheid.

Yn in twalûk sjogge we nei âlderein. Der komme hieltyd mear âlde minsken en se bliuwe ek hieltyd langer thús wenjen. Dêr krije se help fan de wykfersoarchster, we folgje Janny Gorter yn har wurk. Se helpt de minsken thús mei oanklaaie, waskje en hoazzen oandwaan. It tsjinstesintrum yn Menaam docht in soad foar âlderein. Neist aktiviteiten en foarljochting meitsje se ek alle dagen 1000 mielen klear dy't kuolfarsk rûnbrocht wurde. It PIOL, project intensieve ondersteuning Leeuwarden, leveret spesjalistyske soarch oan hûs.

Yn twa dokumintêres ha we omtinken foar merkefamyljes dy't earder troch Fryslân reizgen. Yn dit diel komt de jongere generaasje oan it wurd. Soannen en dochters nimme de attraksje fan har âlden oer. It sit yn it bloed, en is in manier fan libjen. Dy attraksjes moatte ek mei de tiid meigean, sa is it reuzerêd en de achtbaan nij. Mar de oaljekoekekream bliuwt bestean. We sjogge ek by it ferpachtsjen foar de merke by de Snitswike en wat dogge de merkeminsken winterdeis?