Weromrop.frl - útstjoerings

Yn syn solofoarstelling Arendz' Arends siket de Tryaterakteur Jan Arendz nei syn hast nammegenoat Jan Arends, de Nederlânske skriuwer en dichter. We sjogge stikken út de foarstelling en Arendz fertelt hoe't er op skoalle foar it earst yn de kunde kaam mei it wurk fan Arends. Hy fertelt oer it libben fan de skriuwer, mar ek oer syn eigen libben en karriêre.

Keunsthistoarikus Huub Mous makke in tentoanstelling 'De kleur van Friesland' yn it Fries Museum. Hy fertelt oer byldzjende keunst yn Fryslân en de ûntwikkeling dêrfan. De provinsje hat in grutte samling keunst. Galery Van Hulsen spile in belangrike rol en de Fryske Kultuerried. Mei De bende van de blauwe hand kaam it modernisme yn Fryslân yn de jierren 60. Yn de jierren 80 kaam de groep Jonge Friezen op. We sjogge ek yn Museum Belvédère mei Thom Mercuur.

Op 17 april 1945 waard yn opdracht fan de Dútsers de dyk om de Wieringermarpolder hinne trochstutsen en oerstreamden alle lân en pleatsen fan de polder dy't yn 1930 yn kultuer brocht wie. Trije mannen sjogge werom op dy tiid: Sytze Faber, Tjeerd Veenstra en Broer Holtrop. De skiednis fan de polder, de oerstreaming en de weropbou komt oan bod mei argyfbyld ek.

We sjogge by trije keunstners dy't ambachtlik wurkje. Marcel van Berkel (Skylge) is houtkeunstner, Peter Hiemstra (Aldeberkeap) is keramist en Jan Kerkstra en Marion Pannekoek (Wynjewâld) meitsje sieraden. Se fertelle oer har libben en de passy foar wat se meitsje, de ynspiraasje en driuwfear en we sjogge fansels yn de ateliers.

In programma út 2006 oer de gefolgen fan in driigjende fûgelgryp foar hinneboeren, hinnefangers en hinneslachters. Programmamakker Albert Jensma gie mei in ploech hinnefangers op paad en frege oft se har ek soargen meitsje oer de fûgelgryp. De hinnen dy't de Harekiten fange, geane nei hinneslachterij Frisia yn Haulerwyk om ferwurke te wurden. Wat dogge de mannen fan Frisia om it firus bûten de doar te hâlden? Hinnefokker Piet Faber fan Nijeberkeap kriget al pikefel as hy in keppel guozzen fleanen sjocht.