LTV_1OP14_TRANSPORT_120498_WR

1op 14, oer de transportsektor

10 April 1998

Hoe sjocht it libben fan in frachtweinsjauffeur derút? We folgje Jappie van der Werken ûnderweis, hy wurket foar it grutte transportbedriuw De Bruin út Surhústerfean, en we hearre hoe't it foar syn famylje is dat er twa wiken achterinoar fuort is. We sjogge ek op kantoar by De Bruin, se ha 650 frachtweinen op de dyk. By rydskoalle Greidanus yn Boalsert folgje we in learling dy't foar syn rydbewiis giet.

LTV_DI_GOIJUM_080398_WR

Di Gojim: in Jiddyske meldij

08 Maart 2020

Di Gojim makket Klezmermuzyk, Jiddyske brullofts-en dûnsmuzyk. We sjogge by repetysjes en optredens. Jaap Mulder en Tseard Nauta fertelle oer it begjin fan de band en ek de oare leden komme oan it wurd. Klezmermuzykkenner Wim Bloemendaal giet yn op de skiednis fan en ynfloeden op de muzyk.

LTV_LOKALE_OPSJE_010398_WR

De lokale opsje, jong en grien

01 Maart 1998

De partij Gemeentebelangen mei Reitze Ketellapper as listlûker docht it goed yn de gemeente Ljouwerteradiel. Ketellapper, autohanneler en dowehâlder, fertelt dêroer en we sjogge him oan it kampanjefieren. Ek jongeren wurde mear en mear aktyf yn de polityk, we folgje Esra Leeger (CDA) en Simone de Bruin (GrienLinks) yn de oanrin nei de gemeenteriedsferkiezingen.

LTV_YNDRUKKEN_150298_WR

Keunster Jan Loman: Yndrukken

15 Febrewaris 1998

Portret fan byldzjend keunstner Jan Loman fan Beetstersweach. Ta eare fan syn 80ste jierdei binne der ferskate tentoanstellingen. See en skippen komme yn syn (minimalistysk) wurk werom, hy fertelt deroer. Ek sjogge we him oan it wurk yn syn atelier en by it ynrjochtsjen fan in tentoanstelling. De Paerdemarct Fundatie is oprjochte om syn wurk te behearen. De eardere yngenieur by it Kadaster makke ûnder oare it logo fan de Waadferiening en makket haikû's.

LTV_JAPIKS_DREAM_080298_WR_2

Japik's dream: de Aldehou

08 Febrewaris 1998

Programma oer de Aldehou yn Ljouwert, eins in mislearre toer, mar no in toer om grutsk op te wêzen. Amateurhistoarikus Hendrik ten Hoeve fertelt oer de skiednis fan de toer dy't yn 1997 restaurearre is. By dy gelegenheid wie in konsert mei bakstiennen dêr't we de tariedingen ek foar folgje. De opknapte toer moat ek mear ynset wurde foar promoasjesaken.

LTV_ROOMS_YN_FRYSLAN_3_010298_WR

Roomsk yn Fryslân: diel 3: Tsjerke yn krisis

01 Febrewaris 1998

Yn dit tredde diel fan de trijelûk giet it oer de krisis yn de roomske tsjerke, dy stie net mear yn ferbining mei de ûntwikkelingen yn de maatskippij. Pastoar Jan Romkes van der Wal fertelt oer dy ûntjouwingen. Yn Dronryp fuotballen roomske en net-roomske jonges mei-inoar, mar by it útgean waarden de net-roomsken net talitten yn it roomske gebou. Ek eardere ynterviewden út de oare twa dielen komme oan it wurd.

LTV_ROOMS_YN_FRYSLAN_2_250198_WR

Roomsk yn Fryslân: diel 2: De ropping

25 Jannewaris 1998

Yn dit twadde diel fan de trijelûk fertelle twa mannen dêr't se mei wrakselen yn har leauwe. Mebius Brandsma wie pastor, mar krige in relaasje en keas úteinlik foar de leafde. Meindert Krijnsen die de prysterstúdzje, mar keas úteinlik foar it ûnderwiis. Ek Bert van der Wal komt oan it wurd, hy folget de oplieding ta pryster.

LTV_ROOMS_YN_FRYSLAN_1_180198_WR

Rooms yn Fryslân: diel 1: Waartoe zijn wij op aarde?

18 Jannewaris 1998

Earste diel fan in trijelûk. We sjogge by de grutte Roomske tsjerke yn Boalsert. Suster Clara (Truus Palstra) en Sjoerd Palstra fertelle oer it leauwe en de rol fan de tsjerke yn har libben. Skriuwer Piter Boersma fertelt oer de oantinkens oan de tsjerke fan syn jeugd en de famylje Rypma komt oan it wurd oer de tsjerke en de gewoanten. De sfear, it sjongen, de gebrûken, kategismus, bycht, prosesje, grutte húshâldingen en de jongereferiening: it komt allegear foarby.

LTV_FLINKE_JONGES_211297_WR

Flinke jonges

21 Desimber 1997

De kriminaliteit ûnder jongeren nimt mear en mear ta, der is geweld op strjitte, fernielingen en fandalisme en it begjint ek mear op jongere leeftiid. Yn dit programma folgje we in pear fan de jongeren dy't by Het Buro begelaat wurde om werom te kinnen nei de maatskippij, skoalle of wurk. De begelieders komme oan it wurd en we sjogge by de wurkplakken, lykas de fleanbasis en it Cambuurstadion. Yn de Ljouwerter wyk Wielenpôlle binne jongerewurkers ek aktyf.

LTV_MAR_IK_SIL_STRIDE_231197_WR

Mar ik sil stride!: Ried fan de Fryske Beweging

23 Novimber 1997

De Ried fan de Fryske Beweging feroaret wat yn oanpak: fan earder stride tsjin allerhanne saken wurdt no mear sjoen nei hoe't minsken yn Fryslân yn de praktyk better gebrûk meitsje kinne fan de wetlike mooglikheden dy't der binne foar it Frysk en dat se it Frysk brûke. We sjogge de ôfgeande foarsitter Liuwe Westra flyerjen yn in doarp, we sjogge by de betinking fan de Slach by Warns, by Frysk Beweger fan de earste oere Durk van der Schaaf (riedslid FNP), by de gearkomste fan it Kristlik Frysk Selskip en by de Fryske studinteferiening Bernlef yn Grins.

LTV_IN_GOUDEN_OF_IZEREN_HYNST_161197_WR

In gouden of izeren hynst

16 Novimber 1997

We sjogge by de wrâld fan de hynstefokkerij en de hynstekeuring. De belangen yn dy wrâld binne grut. In goedkarde hynst smyt in soad jild op. De hynders wurde toand oan de ynspeksje op de ôfstammelingekeuring. We sjogge by de keuring en tal fan eigeners komme oan it wurd.

LTV_OMMAGIO_091197_WR_2

Frysk Fanfare Orkest op wei nei it WMC

09 Novimber 1997

We folgje it Frysk Fanfare Orkest op wei nei it Wereld Muziek Concours (WMC) yn Kerkrade. Al twa kear ha se wrâldkampioen west, helje se dat no wer? We sjogge by de repetysjes, dirigint Jouke Hoekstra fertelt hoe spesjaal it orkest is om't de leden ek sosjaal in hechte klup foarmje. Ek folgje we twa leden fan it orkest: Durk-Jorrit van der Eems en Fenny Haagsma, se fertelle oer de bân mei har ynstrumint. En we folgje de dei fan it optreden, de reis derhinne, it wachtsjen, it optreden en de útslach fan de sjuery.

Pages