Weromrop.frl - útstjoerings

Jan Eisenga wurket as lobbyist foar de trije noardlike provinsjes yn Den Haag. Hy praat in soad mei Keamerleden en hat fansels kontakten yn de provinsjes. Ien fan syn dossiers is de hege snelheidsline. We sjogge him oan it wurk en we komme yn de kunde mei syn opfolger Henk Postma.

Foar- en tsjinstanners fan wynmûnen komme oan it wurd. Tsjinstanners ha noed oer de oantaasting fan it lânskip en de oerlêst, foarstanners wolle skjinne enerzjy en it smyt wat op. Yn Sibrandahûs is mei sukses fûl protestearre tsjin ferskate plannen, mar de relaasje mei de buorlju waard net better. Yn Boazum hat in boer ien mûne pleatst, de buorlju goed 200 meter fierderop ha oerlêst. Ek in heechlearaar komt oan it wurd, krekt as de polityk en de projektûntwikkeler.

Yn dit diel oer de PC, de belangrykste keatswedstriid fan it jier op it Sjûkelân yn Frjentsjer, giet oer de winners. Ferskate winners, net altyd ek keningen, komme oan it wurd en tinke werom. Under de sprekkers: Hotze Schuil, nûmer 1 fan it klassemint aller tiden, hy keatste fan 1945 oant 1968, Johannes Brandsma, Gerrit Okkinga, Sake Saakstra, Piet Jetze Faber dn Sake Porte.
En it giet oer de druk om te winnen en hoe om te gean mei ferlies.

De PC op de fiifde woansdei fan july op it Sjûkelân yn Frjentsjer is al jierren de belangrykste keatswedstriid fan it jier. Yn dit diel sjogge we nei it ûntstean en wat de PC no sa bysûnder makket. Foarsitter Jan van der Meij komt oan it wurd, krekt as keatshistoarikus Pieter Breuker. Der binne is soad wedstriidbylden te sjen en ek argyfmateriaal. De PC (Permanente Commmissie) is yn 1853 oprjochte nei't der amper mear belangstelling wie foar de Balverkaatsdag. De PC moast in fatsoenlik feest wurde, fûn betinker Jan Bogtstra dy't mar leafst 40 jier PC-lid wie.

Asja is it opfanghûs foar froulju dy't slachtoffer wurden binne fan loverboys en sa yn de twongen prostitúsje kamen. Mei help fan in strak skema leare se in nij deiritme en har libben wer op te pakken. Twa froulju dogge har ferhaal, we hearre fan in ûndersiker oer minskehannel en hearre hoe't de plysje mei it Weaze-team besiket de kriminaliteit yn de rosse buert fan Ljouwert te kearen.