Weromrop.frl - útstjoerings

We sjogge by it wurk fan ferskate dokters: in plastysk sjirurch yn MCL dy't bygelyks flapearen korrizjearret, mar ek yn Nigeria operaasjes docht. By in húsdokter op De Tynje dy't in soad ferskillende minsken sjocht yn syn praktyk en ek besites rydt. By in foetrefleksterapeut yn Koarnjum dy't klachten fia de foet ferhelpe kin en by in natuergenêskundige yn Drachten dy't oan de iris sjen kin wêr't ien lêst fan hat.

We sjogge by fjouwer minsken dy't fan glês har berop makke ha. Yn in fabryk yn Tiel meitsje se grutte glêsplaten fan sân dat yn in oven fan 1600 graden ferwaarme wurdt. Yn Easterwâlde komme dy glêsplaten binnen en wurde se snien. By Steinfort yn Frjentsjer ferwurkje se glês foar isolaasje fan huzen. Ek sjogge we by twa glêzewaskers dy't yn in heechwurker of op in ljedder op in hichte fan 12 meter wurkje. En we hearre fan in glêsblazer hoe't er syn keunstwurken makket.

Yn fjouwer portretsjes sjogge we minsken dy't fan de natuer hâlde. Johan de Jong soarge derfoar dat de goudûle wer yn populaasje tanaam is. Nico Minnema beheart de Alde Feanen by Earnewâld. Jos Hooimeijer wit alles fan de Rysterbosk yn Gaasterlân en Albert Ferwerda beheart it Noarderleech achter de dyk by Marrum. Dizze mannen witte in soad fan natuer, fûgels, planten en beammen.

In portret fan mimegroep Suver Nuver. Har foarstelling 'Danspaleis Jericho of de gevaren van cosmetica' wie in hichtepunt op it Frysk Festival. We prate mei de trije leden fan it selskip: Dette Glashouwer, Peer van den Berg en Henk Zwart oer de Fryske taal en har relaasje mei Fryslân. Ek sjogge we hoe't se har tariede foar in foarstelling en sjogge by tariedingen foar in nije foarstelling dy't by skipswerf De Hoop yn Warkum wêze sil.

Yn dit programma praat Geart de Vries mei Martinus Santema, ûnderwiissaakkundige, oer de gearwurking yn it heger beropsûnderwiis. Ljouwert moat in studintestêd wurde. Se prate oer de rebûlje fan it saneamde Herenakkoord wêrby't Grins de Ubbo Emmius en de agraryske hegeskoalle kwytrekke en Ljouwert it Frysk orkest en tal fan keunstynstellingen. We sjogge ek yn Grins by in tsjinstanner fan dizze ruil en prate mei deputearre Kobus Walsma. Ek sjogge we op de HTS want Ljouwert moat nije technyske opliedingen krije.