Weromrop.frl - útstjoerings

Piter Boersma is berne yn 1947 yn Warten yn in roomske húshâlding. Hy fertelt oer syn libben en wurk, tematyk en feroaringen yn syn skriuwen. We sjogge mei him yn Warten en yn syn hûs yn Wiuwert lêst er foar út eigen wurk. Yn 1972 rjochte er literêr tydskrift Hjir op dêr't er noch altyd redakteur fan is. Yn 1998 krige er de Gysbert Japicxpriis foar syn boek 'It libben sels'.

It koartebaanriden wie foar de oarloch populêr yn Fryslân. Al yn de 18de iuw skreaunen kastlein wedstriden út - foar de manlju 160 meter en 140 foar de froulju - en rieden de winners om prizen. De reedrydwedstriden lutsen grutte kloften publyk. Ald-kampioenen, lykas Atje Keulen-Deelstra, komme oan it wurd en saakkundige Hedman Bijlsma fertelt oer de skiednis. Neist prizen is der ek in soad argyfbyld te sjen. Ek Thialf op It Hearrenfean hat in baan foar de koartebaanwedstriden.

Fjouwer Fryske skriuwers binne dwaande op it nije medium ynternet.Cornelis van der Wal, Albertina Soepboer, Eeltsje Hettinga en Joop Boomsma fertelle oer har eigen side op ynternet en wat de foardielen derfan binne. Se kinne sels wurk pleatse, it is in reklameboerd. Hettinga makket sels in ynternettydskrift Kistwurk. Skriuwer Trinus Riemersma hat ek in eigen side makke, mar hat fierder net folle aardichheid oan it ynternet en freget him ôf oft it de Fryske literatuer fierder helpe sil.

'Tenminste houdbaar tot' is de namme fan in teäterfoarstelling mei Leny Dijkstra en Lianne Zandstra, skreaun troch Leo Dijkstra. We sjogge Leny en Lianne by de repetysje en tariedingen foar it stik en ek fragminten út de foarstelling. En beide fertelle se oer it stik en teäter. Ek Leo Dijkstra en regisseur Janneke Bergsma komme oan it wurd. Leny is de dochter fan Tetman de Vries, dêr is wat argyf fan te sjen.

Prof.dr.ir. Pier Vellinga is klimaatdeskundige. We folgje him yn syn wurk, by in konferinsje yn Den Haag, by lessen oan studinten yn Amsterdam, yn petear mei kommissaris Nijpels, by in telefyzje-optreden by Barend&Witteman en by syn broer op de pleats yn Nijlân. Hy hat noed oer de opwaarming fan de ierde en de tanimmende oerstreamingen. Om minder fossile brânstoffen te brûken moatte we mear wyn- en sinne-enerzjy opwekke seit er en sjen nei biogas.