Weromrop.frl - útstjoerings

Dizze Sadwaande giet oer de grins. We sjogge nei it ûntstean fan grinzen, binne se steatkundich (troch minsken bepaald) of natuerkundich (troch de natuer bepaald). Mei histoarikus en geograaf Meindert Schroor besjogge we trije typen grinzen yn it lânskip: de Swette, ferkaveling en feanskieding. We sjogge yn Gerkeskleaster/Strobos, dit twillingdoarp leit foar in part yn Fryslân en foar in part yn Grinslân. Hoe libbet dat dêr en hoe wie dat foar it transportbedriuw Broersma?

Dizze Sadwaande giet oer genietsje. We prate mei Immie Jonkman, se naam ûntslach by Omrop Fryslân om as freelancer oan de slach te gean. It lykwicht fine tusken wurk en frije tiid falt net altyd ta. We hearre ek wêr't Foppe Kielstra fan genietsje kin en we prate mei de haadmûnts fan it boeddhistyske kleaster yn Makkingea. En prinses op learzens kin fan in soad saken genietsje.

Dizze Sadwaande giet oer ferkearsfeilichheid. In meldpunt sammelet gefaarlike diken, lykas de dyk by Easterein dêr't skoalbern fytse op in smelle dyk en frachtweinen hurd ride. We prate mei deputearre Piet Bijman, leare fan in rydynstrukteur wat we dwaan moatte ast mei de auto yn de berm rydst. Yn Drachten krije skoalbern les yn de ferkearstún. Prinses op learzens fytst troch de stêd, komt dat goed?

Yn 1999 lizze de buordoarpkes Himpens/Tearns noch op it plattelân ûnder Ljouwert. Mar de greiden deromhinne sille folboud wurde mei huzen. Der wurdt mei mingde gefoelens sjoen nei de bou fan de nije Ljouwerter wenwyk Suderbuorren, dy't Himpens/Tearns opslokke sil.

Op 11 april 1945, fjouwer dagen foar de befrijding fan Fryslân, waarden by de brêge oer it Van Harinxma-kanaal by Dronryp trettjin minsken deasketten. Der wiene alve fersetsminsken by; ien fan harren oerlibbe it fjoerpeloton. Yn 1995 makke Omrop Fryslân in rekonstruksje fan dit drama by Dronryp; dizze is yn 2005 herhelle.