Twadde diel fan de dokumintêre oer Fryske fierljeppers dy't yn Súd-Korea meidogge oan de Olympyske Spelen foar net-olympyske sporten. De sporters meitsje ek in slach oer de merk yn de stêd Busan. De Súd-Koreanen hawwe grutte belangstelling foar de fierljepdemonstraasje. Organisator Christophe Mennier komt letter ek nei de fierljepskâns yn Drylts. Hy hat allegear ideeën om de sport noch oantrekliker te meitsjen foar it publyk.
Omrop Fryslân wie yn 1994 by it Heamielfeest yn Boalsert. Heakeninginne Antje Breeuwsma en har gefolch skoden oan foar de tradisjonele rys mei rezinen.
De Ljouwerter folkswyk de Wielenpôlle is mei 200 huzen it lytste wykje fan Ljouwert. Yn gearwurking mei it Noordelijk Film Festival makke Omrop Fryslân yn 2008 in portret fan dizze bysûndere buert, dêr't elkenien inoar noch ken, dêr't bewenners al desennialang wenje en it buerthûs noch in gesellich doarpsplein is.
Strontrace-kopstik Reid de Jong wie yn 2008 ûnderwerp fan dizze dokumintêre. Hy wenne doe al 40 jier mei Cornelie op de fjoertoer yn Warkum, sûnder stroom of rinnend wetter. Reid is bekend wurden as organisator fan de Strontrace. Mei in lading drûge dong sile de skippen om it hurdst fan Warkum nei Súd-Hollân, en werom.
De operafilm Samson en Delilah is basearre op de ferneamde opera fan de komponist Saint-Saëns. De bibelske striid tusken Hebreëers en Filistijnen wurdt oerset nei de hjoeddeistige situaasje mei uzi's en bommen. Fan regisseur Corina van Eijk.
Ed Nijpels hâlde yn 2008 nei njoggen-en-in-heal jier op as kommissaris fan 'e keninginne yn Fryslân. Omrop Fryslân folge Nijpels yn de slipstream doe't syn ôfskied tichterby kaam, fan de steateseal nei polityk Den Haach oant syn wenbuorkerij yn Diken.
Under de reek fan de heechste toer fan Fryslân binne de meiwurkers fan wettertechnologysk ynstitút Wetsus dei yn, dei út, dwaande mei ûndersyk nei wetterproblemen. Enerzjy, fersmoarging en suvering binne de sintrale begrippen. Programmamakker Evert van den Berg folge in tal projekten lykas it winnen fan enerzjy út it mingen fan swiet en sâlt wetter, en it ferwurkjen fan ôffalwetter yn in wenwyk fan Snits.
Dokumintêre oer Rinsmastate yn Driezum, dat tal fan funksjes hân hat: bûtenplak foar adel, earmehûs, gemeentehûs. Eartiids wenne de famylje Van Sytzama der, yn 2008 wie dat de famylje Scheringa.
Hy krige de Musical Award foar de muzyk fan Turks Fruit, skreau hits foar Marco Borsato, wie sjonger fan popgroep De Kast, makke trije solo-albums en wie ôfrûne simmer sa drok mei fan alles en noch wat, dat hy amper tiid hie foar syn grutte passy: it silen. Jan Tekstra akteart, skriuwt, sjongt en jout les oan sawol de Popakademy as oan de jonge silerkes fan Heech.