Sykje

Trainer Gertjan Verbeek is yn 2008 dwaande mei syn lêste seizoen by SC Heerenveen. De club hat it oant dan noch nea sa goed dien yn de earedivyzje. Omrop Fryslân folge Verbeek by de trainingen en thús yn Jobbegea foar in portret.

Der is grutte soarch oer de takomst fan de âlde Fryske tsjerken. Fan de 600 tsjerken yn Fryslân is de takomst fan sa'n 100 tsjerken ûnwis. Stichting Alde Fryske Tsjerken, dy't sa'n 40 tsjerken oernommen hat, kin it wurk amper oan. Der wurdt mei de saakkundigen praat oer de takomst fan de gebouwen. We sjogge by de tsjerken fan Finkegea, Baaium en Ter Idzert.

Yn syn solofoarstelling Arendz' Arends siket de Tryaterakteur Jan Arendz nei syn hast nammegenoat Jan Arends, de Nederlânske skriuwer en dichter. We sjogge stikken út de foarstelling en Arendz fertelt hoe't er op skoalle foar it earst yn de kunde kaam mei it wurk fan Arends. Hy fertelt oer it libben fan de skriuwer, mar ek oer syn eigen libben en karriêre.

Keunsthistoarikus Huub Mous makke in tentoanstelling 'De kleur van Friesland' yn it Fries Museum. Hy fertelt oer byldzjende keunst yn Fryslân en de ûntwikkeling dêrfan. De provinsje hat in grutte samling keunst. Galery Van Hulsen spile in belangrike rol en de Fryske Kultuerried. Mei De bende van de blauwe hand kaam it modernisme yn Fryslân yn de jierren 60. Yn de jierren 80 kaam de groep Jonge Friezen op. We sjogge ek yn Museum Belvédère mei Thom Mercuur.

Op 17 april 1945 waard yn opdracht fan de Dútsers de dyk om de Wieringermarpolder hinne trochstutsen en oerstreamden alle lân en pleatsen fan de polder dy't yn 1930 yn kultuer brocht wie. Trije mannen sjogge werom op dy tiid: Sytze Faber, Tjeerd Veenstra en Broer Holtrop. De skiednis fan de polder, de oerstreaming en de weropbou komt oan bod mei argyfbyld ek.